សៀមរាប៖ តាមការព្យាករពីក្រសួងធនធានទឹក និងឧតុនិយម កម្ពុជានឹងទទួលរងឥទ្ធិពលខ្យល់មួយចំនួនដែលបង្កឱ្យមានភ្លៀងធ្លាក់លាយឡំខ្យល់កន្ត្រាក់ដែលបង្កឱ្យដីជ្រាយ ងាយរលំ ឬបាក់មែកឈើនៅតាមទីតាំងមួយចំនួននៃរមណីយដ្ឋានអង្គរ។
អាជ្ញាធរជាតិអប្សរាបានណែនាំឱ្យភ្ញៀវទេសចរជាតិ និងអន្តរជាតិ អ្នកបើកបរយានគ្រប់ប្រភេទ និងអ្នកដឹកភ្ញៀវទេសចរទាំងអស់ សូមមេត្តាបង្កើនការប្រុងប្រយ័ត្នឱ្យបានខ្ពស់នៅក្នុងអំឡុង ពេលធ្វើដំណើរ ឬទស្សនាប្រាសាទនានានៅក្នុងតំបន់រមណីយដ្ឋានអង្គរ។
អាជ្ញាធរជាតិអប្សរាណែនាំកុំឱ្យចតយានគ្រប់ប្រភេទ ឬឈប់ជ្រកក្រោមដើមឈើ ដើម្បីបង្ការនូវហានិយភ័យនានា ដែលអាចបណ្ដាលឱ្យរងរបួស ឬខូចខាត ទ្រព្យសម្បត្តិ ឬអាចឈានទៅដល់ប៉ះពាល់អាយុជីវិតផងដែរ។
ក្រសួងធនធានទឹកបានបញ្ជាក់ឱ្យដឹងថា នៅថ្ងៃទី៤ ដល់ថ្ងៃទី៦ ខែតុលា រាជធានី និងបណ្តាខេត្តនានា អាចមានភ្លៀងនៅក្នុងកម្រិតពីខ្សោយ ទៅបង្គួរ ជាមួយនឹងទំហំទឹកភ្លៀងធ្លាក់គ្របដណ្តប់លើផ្ទៃដីពី ៤០-៦០%៕
